ប្រែសម្រួល៖លនស្រស់
កូឡុំបូ៖ ប្រទេសស្រីលង្កាបានសន្យាកាលពីថ្ងៃព្រហស្បតិ៍ (ថ្ងៃទី២៧ ខែកុម្ភៈ) ថានឹងដោះស្រាយជាបន្ទាន់នូវជម្លោះដ៏ចំណាយច្រើនរវាងអ្នកភូមិនិងដំរីព្រៃ បន្ទាប់ពីរាយការណ៍អំពីការស្លាប់របស់មនុស្សជិត១.២០០នាក់ និងសត្វជាង៣.៥០០ក្បាលក្នុងរយៈពេលមួយទសវត្សរ៍។
រដ្ឋមន្ត្រីក្រសួងបរិស្ថាន លោកដាំមីកា ប៉ាតាបេនឌី បានប្រាប់រដ្ឋសភាថា ពួកគេនឹងសាងសង់របងអគ្គិសនីបន្ថែម និងប្រើប្រាស់បុគ្គលិកបន្ថែមដើម្បីជួយកាត់បន្ថយការវាយប្រហាររបស់ដំរីលើភូមិដែលនៅជិតដែនជម្រកសត្វព្រៃ។
«យើងកំពុងបង្កើនការវិភាជន៍ថវិកាបន្ថែមដើម្បីកាត់បន្ថយជម្លោះរវាងមនុស្សនិងដំរី ហើយសង្ឃឹមថាក្នុងរយៈពេលខ្លីយើងនឹងអាចកាត់បន្ថយស្ថានភាពនេះបាន» លោកប៉ាតាបេនឌីបានមានប្រសាសន៍។
ចន្លោះឆ្នាំ២០១៥ និង២០២៤ មានមនុស្ស១.១៩៥នាក់ និងដំរីព្រៃ៣.៤៨៤ក្បាលត្រូវបានសម្លាប់ លោកបានបញ្ជាក់។ក្នុងខែមករាឆ្នាំនេះ មានមនុស្សបីនាក់ទៀត និងដំរី៤៣ក្បាលត្រូវបានសម្លាប់។
អ្នកនីតិបញ្ញត្តិប្រឆាំងលោកណាលីន បាន់ដារ៉ា បាននិយាយថាចំនួននេះគឺ «គួរឱ្យតក់ស្លុត» ហើយបានអំពាវនាវឱ្យអាជ្ញាធរការពារប្រជាជន ខណៈដែលធានាថាសត្វព្រៃមិនត្រូវបានធ្វើឱ្យមានគ្រោះថ្នាក់ឡើយ។លោកបានកត់សម្គាល់ថាការបោះចោលសាកសពដំរីព្រៃបានធ្វើឱ្យរដ្ឋចំណាយប្រមាណ១១,៦លានដុល្លារអាមេរិកក្នុងរយៈពេលមួយទសវត្សរ៍ ខណៈដែលសំណងដល់ជនរងគ្រោះពីការវាយប្រហាររបស់ដំរីមានប្រមាណ៤លានដុល្លារអាមេរិកក្នុងរយៈពេលដូចគ្នា។
ការសម្លាប់ឬធ្វើឱ្យដំរីរងរបួសគឺជាបទល្មើសព្រហ្មទណ្ឌនៅប្រទេសស្រីលង្កា ដែលមានដំរីព្រៃប្រមាណ៧,០០០ក្បាល ហើយត្រូវបានចាត់ទុកជាសម្បត្តិជាតិ ដោយផ្នែកខ្លះដោយសារសារៈសំខាន់របស់ពួកវាក្នុងវប្បធម៌ព្រះពុទ្ធសាសនា។
ទោះយ៉ាងណាការសម្លាប់នៅតែបន្តពេលដែលកសិករដែលជួបការលំបាកកំពុងប្រឈមនឹងដំរីដែលវាយលុកដំណាំរបស់ពួកគេ និងបំផ្លាញជីវភាពរស់នៅ។
ដំរីជាច្រើនត្រូវបានឆក់ចរន្តអគ្គិសនី បាញ់ និងបំពុល។ ពេលខ្លះផ្លែឈើដែលមានផ្ទុកគ្រឿងផ្ទុះត្រូវបានប្រើប្រាស់ដើម្បីធ្វើឱ្យសត្វទាំងនេះរងរបួស ជាញឹកញាប់បញ្ចប់ដោយការស្លាប់ដោយឈឺចាប់។
ដំរីក៏ត្រូវបានសម្លាប់ដោយរថភ្លើងដែលរត់កាត់ទីជម្រករបស់ពួកវា។
ដំរីប្រាំពីរក្បាល រួមទាំងកូនដំរីបួនក្បាល ត្រូវបានសម្លាប់នៅពេលដែលពួកវាត្រូវបានរថភ្លើងល្បឿនលឿនបុកនៅតំបន់ហាបារ៉ាណាភាគខាងកើតរបស់កោះកាលពីមួយសប្តាហ៍មុន។ វាគឺជាគ្រោះថ្នាក់ដ៏អាក្រក់បំផុតដែលបានកត់ត្រានៅក្នុងប្រទេស។
ដំរីអាស៊ីត្រូវបានទទួលស្គាល់ថាជិតផុតពូជដោយសហភាពអន្តរជាតិសម្រាប់ការអភិរក្សធម្មជាតិ។
ដំរីប្រមាណ២៦,០០០ក្បាលរស់នៅក្នុងព្រៃ ភាគច្រើននៅក្នុងប្រទេសឥណ្ឌា ហើយអាយុជាមធ្យម៦០ ទៅ៧០ឆ្នាំនៅក្រៅការឃុំឃាំង៕/
ប្រភព៖ AFP/lh
